„UNGER UNS“-Kostümsitzung am 27. Januar 2008

Dis Johr trof sich de „UNGER UNS“-Familich met ehrer Fründe un Jäß ald am 27. Januar zo ehrer – wäje der köteste Session zick un för lang Zigg – einzige Setzung em Kristall-Saal vun der KölnMesse. Met dä Setzung hät unse Verein singe 60. Jebotsdach jefeet: Dis lang Zigg steit för 60 Johr aktive Fläch vun unsem Brauchtum, de Leev zom Fastelovend un e Jeföhl vun „einem Jott un Pott sin“ wie ener Familich.

Et Programm jing pünklich om halver 5 loß: Unse Kleine Rot, an der Spetz unse Präsident un ungerstötz vun uns Senatore, wood met Hölf vun dem staatse Reitercorps Jan von Werth op de Bühn jebraat. Bevör die Kääls vun dem Corps met ehrer Marketenderin uns ehr schön Dänz jezeig han, hät der Präsident all der Lück die Zokunf vum Verein, die JU „ UNGER UNS“, vörjestallt – die Pänz wore met ehre flammneue Weßje schön anzelore.

Als eeschte Redner hät et Rumpelstilzche et Publikum bejeistert; schön, wie hä en singer Rümche die Neuichkeite us der Politik un us dem richtige Levve en unser Stadt op et Koon nohm. Noh im kom ne kölsche Schutzmann. Dä hät zo Vörkommnisse en Kölle dat zom Usdrock jebraat, wat vill Kölsche och esu denke. Em Anschloß wood jeschunkelt un jesunge met de Labesse; dat es en Jrupp, die zick ville Johr fründschaffliche Verbingunge zo unsem Verein ungerhalde deit. Dorop kom ener Knaller vun dä Setzung, der Optrett vum Fussich Julche Marita Köllner, dat en dis Session ald zick 40 Johr op der Bühn steit. It hät met singer natörliche Aat et Publikum, allen vöran unse Präsident en Spetzebötzcher un met nem jroße Marita-Hätz öm der Hals, zom Juze jebraat. De Lück han - mehschtendeils op de Stöhl - jestande un jefeet. Et Fussich Julche wood för ehr Treu zo unsem Verein üvver lang Johr zor Ihresenatorin jemaat. Noh dem dolle Optrett hatte sich all de Lück un de Offizielle en Stärkung en der Paus verdeent.

Der 2. Deil vun der Setzung fing an met der Bürgergarde Blau-Gold, eins vun der staatse Traditionscorps en unsem Fasteleer, die zesamme met ehrem Marieche un singem Jung ehr Corps-Dänz met vill Akkuratess opjeföhrt hät. Donoh wood de Bühn vun de Festpirate jeentert: Die ville Leeder vun de Höhner woote vum Publikum em Ston wie eine Mann metjesunge. Der Saal wor am Tobe un hät der Titel wödlich jenomme „Wenn nicht jetzt, wann dann?“. Mer leet de Junge eesch vun der Bühn eraff, nohdem se mihmols ene Beihau jejovve hatte. Se maaten dann Plaatz för de Regente vun unser jecke Zigg, uns Dreijesteen: Prinz Rainer I., Jungfrau Albertina un Buur Harald han dat Volkspill met ehrem zimpatische kölsche Kommang bejeistert un rockten zo dem Hit vun Brings „Su ne Daach, su schön wie hück“ esu richtig aff, bevör se sich för Rusemondaach met all de Lück veravredt han.

Donoh hät uns der Bergische Jung, zo däm mer nit mih vill sage muss, ärch vill Pläseer jebraat: Hä kritt jekunnt „Tochter Zion“ un „Scheißejal“ unger eine Hot un hä hat – och met hösche Tön – sing Publikum fass em Jreff. De Lück leete in eesch trecke, nohdem hä e paar Beihäu zom Beste jejovve hat. Noh im kom ein vun de beste Danzjruppe em kölsche Fasteleer, de Höppemötzjer. Die han met ehrer artistische Dänz met vill Hevve un Wirfe vun ehrer lecker Mädcher die Jecke bejeistert.

Zom jode Schloß trote de Paveier op, die in dis Session dat Jubiläum „25 Johr op de Fastelovends-Bühn“ jefeet han. Doför, dat se dem „UNGER UNS“ jenau su lang treu jewäs sin, woote se vun unsem Präsident zo Ihremetjlidder jemaat. Die Junge kunnte met ehrer allseits bekannte Leeder de Lück zom Engkspurt vun dä Setzung anemeere. All wore se raderdoll, un  en Üvvereinstemmung met dem Micky Brühl han se jesunge „Schön ist das Leben“. Zom Enlaufe en et Ziel jov et bei dis Jebotsdachs-Setzung noch e herrlich Förwerk op de Bühn met vill Flitter un ener jroße anjestochene „60“.

Zom Affzoch vum Kleine Rot trok dann noch flöck dat Damen-Dreijesteen vun dem befreundete „1. Karnevalsverein Kiescheflittscher Rurberg-Woffelsbach e.V.“ op de Bühn. De Jungfrau vun denne nette Fraue es och Metjlidd en unsem „UNGER UNS“.

Kootöm kann mer fasshalde: Et wor en prima Setzung met allem, wat ne Kölsche bei ener Setzung esu han well. Luustere - och ens op die jet leisere Tön -, luure - op die staatse Corps un Danzjruppe - , op de Trumm kloppe un all die uns jot bekannte Leeder, die mer esu jän han, laut un kräftich metsinge. Et wor e anjemesse Feß för der 60. Jebotsdach, an dat mer noch lang zoröckdenke wäde. Mer danke unser Literatin för dat schöne Programm un unsem Präsident, dat hä dat souveräne Rejalt en der Setzung hat. Dat hat Ehr jot jemaat!

Bejeistert wor och unse Besök, der sich met uns op die Setzung bejovve hat. Et Lena hat wohl met de wiggeste „Anreis“ hinger sich. Dat Mädche kom us Novosibirsk en Sibirie un hät domols – als en anjehende Lehrerin för Dütsch – he bei uns en Kölle ne Sproch-Kurs jemaat. Met der ein ov andere Üvversetzung hät et ärch vill verstande. Et wor luuter am Staune, wie vill Spass all die Lück jehat han – un dat, ohne besoffe zo sin. Dat Mädche denk immer widder jän an die „UNGER UNS“-Setzung un an der janze Fastelovend en Kölle zoröck - su schriev it.

Horst Heller

Zurück zur Startseite