Mir üvver uns
(Zurück auf Hochdeutsch, bitte
hier
klicken!)
D’r kölsche
Fastelovendsverein „UNGER UNS“ hät anjefange met d’r Jemeinschaff vum Bedrev vum
Poss-Amp 8 vun d’r Ieserbahn am Jläbbischer Wall en Kölle. 1948 hät sich et
Beston vun däm Amp zom 100. Mol jejöhrt; dröm han die Lück, die do beschäftich
wore, e jroß Fess jefeert, ofschüns et öm de Weetschaff un de Nüsele domols ärch
mau wor. Noh dem Jrundsatz, dat mer en jot jelungene Veranstaltung noch ens
maache soll, han de Lück vun däm Amp beschlosse, die ahl Tradizijon widder
opzenemme, jedes Johr e jroß Fess zosamme ze fiere; dat hatt mer bes en de
Kreech eren jöhrlich jenau esu jemaat, mer dät en denne Zigge doför
Kameradschaffs-Treffe sage.
Öm leichter un flöcker
e Projramm för su e Fess zesammejeknuv ze krijje, woote die Treffe en de
Fastelovendszick verlaat. Dodrus sin dann Fastelovends-Setzunge jewoode un dat
„minschliche Jeröss“ vun denne Veranstaltunge woot fassjeklopp zo nem Verein.
D’r „UNGER UNS“ es
unger de kölsche Fastelovends-Jesellschaffte, die dem Festkomitee Kölner
Karneval anjeschlosse sin, d’r einzige, dä sich met Name och Verein nenne deit.
Drop lät hä jroße Wät, do hä en däm Woot e Synonym süht för en
Familije-Jesellschaff, en der jederein der ander kenne un met im ne Ömjang op
fründlije Aat un Wieß fläje deit. Hä es en Familije-Jesellschaff, die nit nor us
Kölsche besteit, sondern en der och Imis - alsu Lück vun mih ov winnijer wick
druße - ehre Plaatz finge künne ov at jefunge han. Jung Lück, die sich
angascheere welle, sin em Verein luuter jän jesin un wäde besondersch jefördert.
D’r „UNGER UNS“ deit de kölsche Sproch un d’r Fasteleer fläje -kootöm et kölsche
Brauchtum-, un dobei deit hä och jän Imis met enbetrecke.
|
|
Unse
Verein hät em Momang su eröm 300 Metjlidder, die natörlich nit mih all bei der
Poss am arbeide sin. Uns Metjlidder
kumme hück us sämpliche Beröf un us all
Jäjende vun Dütschland. Bei uns künne Fraulück un Mannslück Metjlidd wäde. Ehr
künnt Üch ene Andraach för Metjlidd zo wäde
he erungerlade. Ehr möt der Andraach
nor usfülle un ungerschrevve an unse Anschreff Gotenring 56 en 50679 Köln
schecke. Andräch met Extra-Kondizijone för e Eh-Jespann ov för en janze
Familich künnt Ehr beim Vörstand anfordere. Enzwesche sin at mih alswies 27 %
vun uns Metjlidder Fraulück. Mer dun dat usdröcklich bejröße un dun uns och en
aktive Metarbeid vun de Fraulück ärch wünsche.
|
|
|
D’r Beidraach em
Verein koss em Augebleck 100,- € em Johr, för e Eh-Jespann koss et 150,- € un
för en janz Familich 175,- €. Wann Ehr ne Enbleck en d’r Verein han wellt, dä
deefer jon soll, doot einfach beim Vörstand nohfroge.
|
Mer
dun Üch als Metjlidd beede:
|
|
Wann Ehr Kaate för
unse Veranstaltunge han wellt, wäde Ör Wünsch vörjetrocke.
|
|
|
En Zeidung vum
Verein, die e paar Mol em Johr eruskütt un Üch dat sage deit, wat em Verein
läuf.
|
|
|
Am 11.11. en jedem
Johr uns Veranstaltung zom Anfang vum Fastelovend (Entrett 16.- €).
|
|
|
Ein ov zwei jroße
Setzunge en de Session (Entrettskaate ab 25,- €, för jung Lück ab 15,- €).
|
|
|
Till
Alaaf! Janz noh dran an Spetzekräfte us dem kölsche Fasteleer
(Entrettskaat
20,- €).
|
|
|
Feschesse am
Äschermettwoch-Ovend, uns Usklang vun d’r Session.
|
|
|
Wieverfastelovend
jeit d’r Verein met nem jroße Schmölzje em Zoch vun de
Fastelovends-Jesellschaff „Jan von Werth“ met. He kann jederein metmaache, dä
ens jän en ne Fastelovends-Zoch erenruche well. Anmeldunge doför beim
Vörstand.
|
|
|
Müjjelichkeit, em jroße Rusemondaachszoch
metzejon.
|
Sulang et uns jitt, es
et bei uns Tradizijon, uns Metjlidder, Fründe un Jäss beste Veranstaltunge zo
beede. De beste Lück vum kölsche Fasteleer en d’r Bütt un op d’r Bühn jaranteere
zick Johre de beste Stemmung un unverjessliche Setzunge.
Der jode üßere Rahme
vun uns Veranstaltunge krijje mer hin met de staatse Säl vun der KölnMesse un
vun kölsche Spetze-Hotels. He üvverall jitt et och lecker jet zo müffele.
Bei all unse
Veranstaltunge sin uns Jäss hätzlich wellkumme. Och wann natörlich uns kölsche
Muttersproch zo höre es, su sin doch vill Vördräch en der „Ömjangssproch vum
Rhing“, die och vun Imis, die evvens nit us Kölle sin, verstande weed.
Zom Schloss:
Mer dun hemet all denne Lück Dank sage, die ene Beidraach
zom Jelinge vun uns Veranstaltunge jeleis han ov dat en Zukunf dun welle, ov
durch Spende, ov durch ehr Arbeid. Ohne die Hölf künnte mer uns Veranstaltunge
su nit maache!
D’r Vörstand